ဗုဒ္ဓပူဇနိယယိမ်း

alt text

၁၉၆၆ ခုနှစ် ပြည်ထောင်စုနေ့တွင် စစ်တွေမြို့မှတင်ဆက်သည့် အကယိမ်းတစ်ခု ဖြစ်သည်။ ရခိုင်တို့သည် ဗုဒ္ဓဘာသာကို ကိုင်းရှိုင်းခြင်းနှင့်အတူ သျှင်တော်ဗုဒ္ဓကို ဆီမီးဖြင့်ပူဇော်ပုံကို သရုပ်ဖော်ထားသည်။

တေးသွားကို အရိုးစွဲ ရခိုင်ယိုင်းသာခြင်း ဖြစ်သော ‘လက်စွပ်ချေ တစ်ခြေ ပျောက်ခရေ၊ ရှာရေမရ၊ အသားညို လူပျိုလက်မာ၊ ဘယ်ဘက်ကလေ၊ ဘယ်ဘက်က’ ကို အခြေခံထားသည်။

ဗုဒ္ဓပူဇနိယသာခြင်း

ဦးဦးဘသာ(ရက်ကန်း) ရေးသားသည်။ ၁၉၉၇ ခုနှစ်တွင် ထွက်ရှိခဲ့သည့် ပုခက်ထဲကအိပ်မက်များ သီချင်းခွေ၌ ဦးအောင်ကျော်သာ၊ မဥမ္မာသန်းနှင့် မစန္ဒာသန်းတို့ သီဆိုထားသည့်မူကို အထူးလူသိများသည်။

ချမ်းချမ်း၏ ပြန်လည်သီဆိုမှုနှင့် တေးရေးအမည် ဂယက်

ဗုဒ္ဓပူဇနိယသာခြင်းကို ၂၀၁၅ ခုနှစ်ဝန်းကျင်တွင် ဗမာတေးသံရှင် ချမ်းချမ်းက ဗမာစကားဖြင့် ပြန်လည်သီဆိုပြီး သူမ၏ အိပ်မက် အယ်လ်ဘမ်တွင် ထည့်သွင်းဖော်ပြခဲ့သည်။ အဆိုပါဖော်ပြမှုတွင် တေးရေးဆရာ အမည်ကို မြင့်မိုးအောင်ဟုသာ ဖော်ပြခဲ့ပြီး မူရင်းနှင့်ပတ်သက်၍ တစုံတရာ ဖော်ပြထားခြင်း မရှိသည့်အပြင် အွန်လိုင်း၌ သီချင်းရောင်းချသည့် ပလက်ဖောင်းဖြစ်သော Myanmar Music Store တွင်လည်း တေးရေးအမည်ကို Myint Moe Aung ဟုသာ ဖော်ပြခဲ့သည့်အတွက် ရခိုင်များအကြား အထူးပင် မကြေမလည် ဖြစ်ခဲ့ကြသည်။

အဆိုပါဖြစ်ရပ်နှင့် ပတ်သက်၍ ဂီတမှူးအောင်လီက ဤသီချင်းကို ပြန်လည်ဖန်တီး တီးခတ်သူမှာ မိမိဖြစ်ကြောင်း၊ မြင့်မိုးအောင်ကလည်း ဤသီချင်းကို မိမိကိုယ်တိုင် ရေးသည်ဟု မည်သည့်အခါကမျှ မပြောခဲ့ဖူးသလို စာနယ်ဇင်းရှင်းလင်းပွဲ၌လည်း ရခိုင်သီချင်းပင်ရင်းဖြစ်ကြောင်း ရှင်းပြခဲ့ဖူးသည်ဟု ပြန်လည်တုံ့ပြန် ပြောကြားခဲ့ကြောင်း ထိုစဉ်က သတင်းအချို့တွင် ဖတ်ရသည်။ ချမ်းချမ်း၏ တကိုယ်တော်တေးစီးရီးတွင် မြင့်မိုးအောင် ဖြစ်နေသည်မှာ ချမ်းချမ်း၏ မှားယွင်းဖော်ပြချက်သာ ဖြစ်သဖြင့် ချမ်းချမ်းတွင် အပြည့်အဝ တာဝန်ရှိသည်ဟု သူက ဆိုသည်။

သီချင်းကို နှစ်သက်၍ တေးရေးမြင့်မိုးအောင်က ပုံစံအသစ်ဖြင့် ပြန်လည်အသက်သွင်းခြင်းသာ ဖြစ်ပြီး သီချင်းနှင့် ပတ်သက်၍ မည်သည့်အကျိုးအမြတ်မှ ရရှိခြင်း၊ ရယူခြင်းမရှိဟု အောင်လီက ဆိုသော်လည်း သီချင်းမှ ရရှိလာမည့် အကျိုးအမြတ်များ မည်သူ့ထံသို့ ရောက်ရှိမည်ကိုမူ ထိုစဉ်က ရှင်းရှင်းလင်းလင်း မရှိခဲ့ပေ။

ကိုးကား

၁။ ရခိုင်သုတအဘိဓာန် - အောင်လှသိန်း (၂၀၁၅)